Tuesday, April 16, 2019

செங்காந்தள் - கலப்பைக் கிழங்கு.- Cenkantal Gloriosa superba.

பெயர் :- செங்காந்தள்.

தாயகம் :- தென் கிழக்கு ஆசியா மற்றும் ஆப்பிரிக்கா.

தாவரவியல் பெயர் :- Gloriosa superba.(குளோரியோசா சுபர்பா).

வரிசை :- Liliales.

 குடும்பம் :- Colchicaceae. (கொல்ச்சிகேசி)

பேரினம் :- காந்தள்.

வேறுபெயர்கள் :- காந்தள், கார்த்திகைப்பூ, கண்வலிக்கிழங்கு, கலப்பைக்கிழங்கு, வெண்தோன்றிக்கிழங்கு, கார்த்திகை கிழங்கு.



தாவரத்தின் தன்மை :- செடி வகையான இது கொடிபோல் படரக்கூடியது. இதன் இலைகளுக்கு இலைக்காம்புகள் கிடையாது. இதன் விதைகளும், கிழங்கும் ஏராளமான மருத்துவ குணங்களை கொண்டுள்ளதால் இது தமிழ்நாட்டில் பரவலாக பயிரிடப்படுகிறது. குறிப்பாக திருப்பூர், கரூர், திண்டுக்கல், சேலம், பெரம்பலூர், திருச்சி, நாகப்பட்டினம் முதலிய இடங்களில் இது பயிரிடப்படுகிறது. ஆண்டொன்றிற்கு 600 முதல் 700 மெட்ரிக் டன் வரை உற்பத்தி செய்யப்படுகிறது.


               இதை விதைகள் மூலமாகவும் கிழங்குகள் மூலமாகவும் பயிரிடலாம் என்றாலும் பெரும்பாலும் கிழங்குகள் மூலமாகவே இது பயிரிடப்படுகிறது. நடவு செய்து 180 நாட்களில் அறுவடைக்கு தயாராகிவிடும். ஒரு செடியிலிருந்து சுமார் 100 கிராம் விதைகள் பெறப்படுகிறது. இதன் விதைகளும் கிழங்குகளும் மருத்துவத் தன்மை வாய்ந்தவை. ஏக்கருக்கு சுமார் 100 கிலோ விதையும், 200 முதல் 300 கிலோ கிழங்கும் மகசூலாக பெறமுடியும்.


               1 கிலோ விதை சுமார் 700 முதல் அதிகப்படியாக 3,000 ரூபாய் வரை விற்பனையாகிறது. இதற்கு அதிக அளவு நீர் பாய்ச்ச வேண்டிய தேவையும் இல்லை என்பது கூடுதல் சிறப்பு. சொட்டுநீர் பாசனமே போதுமானது.

பூக்களின் தன்மை :- தமிழ்நாட்டின் மாநில மலர் என்ற பெருமையை இது பெற்றுள்ளது குறிப்பிடத்தக்கது. ஜிம்பாவ்வே நாட்டின் தேசிய மலராகவும் அங்கீகரிக்கப்பட்டுள்ளது.


               அகல்விளக்குபோன்ற ஆறு இதழ்களை கொண்ட பெரிய பூவினைகொண்டது. இதழ்களின் கீழ்புறம் கதிர் போன்ற 5 மகரந்த பைகளும் காணப்படுகின்றன. பூக்களின் இதழ்கள் வரிசையாக பச்சை, மஞ்சள், சிவப்பு வண்ணம் கொண்டதாக இருக்கும். தீ கொழுந்து விட்டு எரிவது போல் தென்படுவதால் இப்பூவை ''அக்கினிசலம்'' என அழைக்கின்றனர்.


               கார்த்திகை மாதத்தில் இது பூப்பதால் ''கார்த்திகைப்பூ'' என்ற சிறப்பு பெயரும் இதற்கு உண்டு. இதற்கு ''கண் நோய் பூ'' மற்றும் ''கண்வலி பூ''  என்ற பெயரும் உள்ளது. இதனை தொடர்ந்து உற்று நோக்கினால் கண்நோய் வருகிறதாம் அதனால் இப்பெயர். ஆனால் அதில் உண்மையில்லை. கண்நோய் பரவும் பருவ காலங்களில் இதுவும் பூப்பதால் பழியையும்,பாவத்தையும் இது சுமக்க வேண்டியதாயிற்று.

காய்களின் தன்மை :-  இது பச்சை நிறத்தை கொண்டது. காய்களின் உள்ளே மிளகு போன்ற விதைகள் காணப்படும். ஒவ்வொரு காய்களிலும் 70 முதல் 100 விதைகள் வரை இருக்கும். இது விஷத்தன்மைவாய்ந்தது.



                இதன் விதைகளில் ''கோல்ச்சிசின்'', ''சுபர்பின்'', ''கோல்சிகோசைடு'', ''தையோ  கோல்சிகோசைடு'' போன்ற அல்கலாய்டுகள் உள்ளன. இவைகள் ''கவுட்'' என்னும் மூட்டு வீக்கம், வாதநோய், தொழுநோய், வெண்குஷ்டம் மற்றும் மூட்டு அழற்சி நோய்களுக்கு ஒரு சிறந்த  தீர்வாக விளங்குகிறது. எனவே இது இங்கு பயிரிடப்பட்டு வெளிநாடுகளுக்கு ஏராளமாக ஏற்றுமதி செய்யப்படுகிறது. இதன்மூலம் ஆண்டுக்கு 100 கோடி ரூபாய் வரை அந்நிய செலவானி கிடைக்கப்பெறுகிறது.

கிழங்குகளின் தன்மை :- கிழங்குகள் பொதுவாக இரு பிரிவுள்ளதாக இருக்கும். இது கலப்பை வடிவில் இருப்பதால் கலப்பை கிழங்கு என அழைக்கப்படுகிறது. இது அதிகப்படியாக 100 கிராம் எடை கொண்டதாக இருக்கும்.



               இது மருத்துவத்துறையில் பெரிதும் பயன்படுத்தப்படுகிறது. இக்கிழங்கில் உள்ள ' ''கோல்ச்சிசின்'', ''கோல்சிகோசைடு' முதலிய அல்கலாய்டுகள் சிறந்த மருந்து மூலக்கூறுகள் ஆகும்.

               இது மருந்து தன்மை உள்ள கிழங்கு என்றாலும் விஷத்தன்மையையும் கொண்ட கிழங்காகும். இதன் விஷத்தன்மையை உரிய முறையில் நீக்கிய பின்பே மருத்துவத்துறையில் பயன்படுத்துகிறார்கள். நஞ்சுத்தன்மைகொண்ட இக்கிழங்கை நேரடியாக சாப்பிடுதல் கூடாது. மீறி சாப்பிட்டால் உயிருக்கு ஆபத்து ஏற்படும். குறைந்த அளவில் சாப்பிட முடிகள் உதிர்த்து போகும், தோல்கள் பாதிப்படையும் அபாயமும் உள்ளன.

மருத்துவத்தன்மை :- மூட்டு அழற்சி நோய்க்கு விதைகளிலிருந்து, கிழங்குகளிருந்தும் மருந்துகள் தயாரிக்கப்படுகின்றன. மூலிகை மருத்துவத்தில் இது தேள்கடி, பாம்புக்கடி, வண்டுக்கடி முதலியவற்றிற்கு மருந்தாக பயன்படுத்தப்படுகிறது.


               இந்த மூலிகையை பயன்படுத்தி தயாரிக்கப்படும் தைலத்தால் எலி, பூரான், வண்டு கடித்த விஷங்கள் நீங்கும். மேலும் சொறி, சிரங்கு, படை, மேகநோய் முதலியன நீங்கும். மேலும் தலையிலுள்ள பேன்களை ஒழிக்கவும் இது பயன்படுத்தப்படுகிறது.

               எனவே இத்துணை சிறப்பு பெற்ற செங்காந்தள் செடிகளை பணப்பயிராக பயிரிடுவதின் மூலம் சிறந்த லாபத்தைப் பெற முடியும்.

No comments:

Post a Comment

உங்கள் கருத்துக்கள் வரவேற்கப்படுகிறது.