Thursday, April 04, 2019

மண்ணுளி பாம்பு (அ) இருதலை மணியன் பாம்பு - manuli pambu [Sand boa].


பெயர் :- மண்ணுளிப்பாம்பு (அ ) இருதலை மணியன் பாம்பு.

விலங்கியல் பெயர் :- Eryx johnii

தாயகம் :- இந்தியா, இலங்கை, பாகிஸ்தான், ஈரான், நேபாளம்.

குடும்பம் :- Boidae.



துணைக்குடும்பம் :- Erycinae.

இனம் :- E.Johnii.

பேரினம் :- Eryx (genus)

வாழிடம் :- வயல்வெளிகளிலும், மணற்பாங்கான நிலங்களிலும், காடுகளிலும் வாழ்கின்றன.

               இது பாம்பு இனத்தை சார்ந்தது அல்ல, மண்புழு இனத்தை சார்ந்தது என்கிற ஒரு கருத்தும் நிலவுகிறது. இது எப்போதும் மண்ணுக்குள்ளே தன் உடலை மறைத்துக் கொண்டு வாழ்வதால் மண் பாம்பு, மண்ணுளிப்பாம்பு என பெயர் பெற்றது.

               அமெரிக்காவில் சில வீடுகளில் இப்பாம்புகள் செல்லப்பிராணியாக வளர்க்கப்படுகின்றன.



வேறு பெயர்கள் :- இதற்கு மண்பாம்பு, மண்ணுளி பாம்பு, சிவப்பு உழவன் பாம்பு, இருதலைமணியன் பாம்பு, இருத்தலை பாம்பு என்று பல பெயர்கள் உண்டு.

               இதற்கு இருதலை மணியன் என்று பெயர் இருப்பதால் இந்த பாம்பிற்கு இரண்டு தலைகள் உண்டு என்று நினைத்து விடாதீர்கள். இதற்கு இரு தலைகள் எல்லாம் கிடையாது. இதன் வால்பகுதி உருண்டு மொட்டையாக பார்ப்பதற்கு தலைபோல் பருமனாக காணப்படுவதால் இது ''இருதலை மணியன்'' என்று அழைக்கப்படுகிறது.



உடலமைப்பு :- இந்த பாம்புகள் வெவ்வேறு உடல் நிறங்களை கொண்டுள்ளன. சில செம்பழுப்பு நிறத்திலும் சில மஞ்சள் கலந்த செம்பழுப்பு நிறத்திலும், சில சாம்பல் கலந்த கரும்பழுப்பு நிறத்திலும் சில கருஞ்சிவப்பு நிறத்திலும் இருக்கின்றன.

               பலவகைப்பட்ட மண்ணுளிப்பாம்புகளை கீழே காணலாம்....














               இதன் உடல் தொடுவதற்கு வழுவழுப்பாக இருக்கும். இதன் உடல் உருளை வடிவமாகவும், 2 அடி முதல் அதிகப்படியாக 3 அடி வரை நீளம் கொண்டதாகவும் இருக்கும்.

               தலை கழுத்தைவிட சிறியதாக இருக்கும். மிகச்சிறிய கண்களைக் கொண்டது. உடல் பளபளப்பான மழுங்கிய செதில்களைக் கொண்டுள்ளது.

இயல்பு :- சாதுவான குணம் கொண்டது. பயந்த சுபாவம் உடையது.

 உணவு :- இரவில் இரை தேடும். எலிகள் மற்றும் இயற்கை கழிவுகளை உண்டு வாழும். இதனால் நீண்ட நாட்கள் உணவு எதுவும் சாப்பிடாமல் பட்டினி இருக்கவும் முடியும்.

               இதன் கழிவுகள் வயல்களுக்கு நல்ல உரமாக பயன்படுவதால் இது விவசாயிகளின் நண்பன் என அழைகப்படுகிறது.

இனபெருக்கம் :- இது குட்டிபோட்டு தன் இனத்தை பெருக்குகின்றன. ஒரு நேரத்தில் 5 முதல் 8 குட்டிகள் வரை போடும்.


விஷத்தன்மை :- விஷத்தன்மை அற்றது. இது யாரையும் கடித்ததாக தெரியவில்லை. மண் பாம்பு கடித்தால் தோல்வியாதி வரும் என்பது வெறும் கட்டுக்கதை என்றே கூறவேண்டும்.


               இப்பாம்பு பல அரிய மருத்துவக் குணங்களை  தன்னகத்தே கொண்டுள்ளது என்கிற ஒரு தவறான நம்பிக்கையால் சட்டவிரோதமாக பிடிக்கப்பட்டு வெளிநாடுகளுக்கு கடத்தப்படுகின்றன.

               மேலும் இது ''வாஸ்து பாம்பு'' என்று கூறி மக்களை ஏமாற்றி சட்டவிரோதமாக விற்கப்படுகிறது. எனவே இப்பாம்பு எண்ணிக்கையில் குறைந்து அழிவின் விளிம்பிற்கு சென்று கொண்டிருக்கின்றன.

               எய்ட்ஸ் மற்றும் கேன்சர் நோய்களை குணப்படுத்துகிற ஆற்றல் இப்பாம்பிற்கு உண்டு என்கிற ஒரு தவறான புரிதலே இப்பாம்பை வேட்டையாட தூண்டுகிறது. சொல்லப்போனால் நோய்களை குணப்படுத்துகிற எந்த சக்தியும் இப்பாம்பிற்கு கிடையாது என்பதே உண்மை.

🐍🐍🐍🐍🐍🐍🐍🐍🐍


No comments:

Post a Comment

உங்களின் கருத்துக்களை எங்களுடன் பகிருங்கள் . நிர்வாகத்தின் பரிசீலனைக்குப்பின் வெளியிடப்படும்.

Next previous home